تذكرني هذه الاغنية باجدادي الاثنين، عندما كنت اقف علي اقدامهم و يرفعوني بأرجلهم و هم يقولون كلمات الاغنية، تختلف بالطبع الاغنية من بيت لآخر، و ولدي يحذف بيتا كاملا منها فجعل “الخباز يبغى حشيش” بدل البقرة التي تريده، فيختلف معنى الاغنية كليا… جيل آخر زمن.
تقول كلمات الاغنية التي نغنيها لولدنا، و هي تختلف عن الاغنية التي في الفيديو قليلا
دوها يا دوها
والكعبة بنوها
وزمزم شربوها
سيدي سافر مكة
جاب لي زمبيل كعكة
والكعكة عند الخباز
والخباز يبغى حليب
والحليب عند البقرة
والبقرة تبغى حشيش
والحشيش فوق الجبل
والجبل يبغى مطرة
يا مطرة حطي حطي
علي قريعة بنت اختي
بنت اختي جابت ولد
سمته عبدالصمد
هل تعرفونها هكذا ام بكلمات مختلفة؟
شكرا لأم مجاهد علي مشاركتها الاغنية في صفحتها علي كتاب الوجه 
تعليقات من خلال الفيسبوك
Powered by Facebook Comments
18 Comments
[...] This post was mentioned on Twitter by فؤاد الفرحان, قصي فيومي. قصي فيومي said: تدوينة جديدة: دوها يا دوها http://j.mp/aRI6a8 [...]
تقريبا أذكرها بنفس الكلمات هذي
لكن البداية مختلفة
ناني يا دوها
والكعبة بنوها
من زمزم رشوها
سيدي نازل مكة
اشترالي كعكة
والبقية مثل اللي ذكرتها
اهلا يا صالح، و شكرا لاضافتك، جميل جدا ان لكل بيت او عائلة نسخة مختلفة
هههههههه الله على الذكريات
نعم انا اتذكرها بنفس الكلمات بالضبط لكن باختلاف بسيط جدا انه الولد يبغى حليب والحليب عند البقرة .. الخ
ما اتذكر كعكة ولا خباز
سألت بعض الشباب اللي حولي هنا كل واحد طلعت عنده مختلفة تماما عن اللي اعرفها انا
اهلا يا هاني، احيانا الذكريات تأتي لنا كلنا فجأة
و كما قلت لصالح، جميل جدا ان لكل عائلة نفس الاغنية مع بعض الاختلاف
بالمناسبة اتذكر والدي كان يسوي نفس الحركة، حركة الرفع بالارجل وعند البيت الاخير يرميني وراه بحركة شقلبية وهي أحلى ما في الموضوع كله ههههههههه
الله يسامحك نبشت مجلد قديم جداً من الارشيف هههه
و هذه هي احلي ما في الاغنية للاطفال، و اعتقد انها تغنى من قبل الرجال بسبب هذه الحركة… مع ان الفوطة (او الوزار) لا يستر كثيرا… هيا مبن نبش المجلدات الان
هههه
اوووه ياحظكم حقتكم الحكاية ليش قصيرة كدا .. عندنا طويلة وكنت اطفش وهم يغنولي هي وانا نفسي امشي هههههههههههه
دوها يا دوها
والكعبة بنوها
سيدو سافر مكة
جاب لي زنبيل كعكه
والكعكه جوا المخزن
والمخزن مالو مفتاح
والمفتاح عند النجار
والنجار يبغا الفلوس
والفلوس عند السلطان
والسلطان يبغا البناات
والبنات عند البقرة
والبقرة تبغا الحليب
والباقي زي ما قلتها ^ــ^
وافتكر أيامها وأنا صغيرة يااا إني كرهت الكعكه هذه اللي سوت هرجة ع الفاضي ههههههههههههههه
الله يرحم أيااااام وزكرياااات
تسلم على إعادة الماضي لذاكرتي =)
ماشاء الله اغنيتكم طويلة، و لكن شكرا علي مشاركتنا بها، شكلي راح اجرب اغنيها لولدي، يمكن يطفش و ما يقول لي اغني له دوها مرة ثانية
[...] قصي على مشاركتك لهذه الذكريات الجميلة واللعبة القريبة من [...]
الله .. أيام زمان ..
أنا كنت اعرفها زي تونا ..
بس بدل جوا كنا نقول ” في ”
والفولوس عند السلطان .. والسلطان يبغا المنديل .. والمنديل عند الصغار .. والصغار يبغوا الحليب .. والحليب عند البقرة .. والبقرة تبغا الحشيش .. والحشيش فوق الجبل .. إلخ ..
بس حلوة ..
ماشاءالله، هناك ايضا اطول من اغنية تونا
الله يحلي ايامك
ما اعرف ليش بكيت لما سمعت الأغنية!
عمري ما كنت احب هذه الأعنية لكن الام في بداية الفيديو شبه ماما بدرجة عجيبة…
نحن نقولها بنفس الكلمات لكن اللحن يختلف شوية…
فيديو مؤثر..
شكرا قصي..اختيار موفق
شكرا لك يا مها
يالله زمااان
أنا لماسمعتها عا MBC شوي وأبكي
اتذكر كنا نقول
دوها يادوها والكعبه بنوها سيدي سافر مكه جابلي حتتة كعكه والكعكه في المخزن والمخزن مالوا مفتاح والمفتاح عند النجار والحليب عند البقرة والباقي نفس هذا اللي كتبته :-
“والبقرة تبغى حشيش
والحشيش فوق الجبل
والجبل يبغى مطرة
يا مطرة حطي حطي
علي قريعة بنت اختي
بنت اختي جابت ولد
سمته عبدالصمد”
ماعندنا زمزم رشوها :/ وماعندنا زمبيل .. حتتة كعكه :/
نص تفاحه
شكرا لك علي اضافتك
اسما اليوم زعلانه تبغا حبة تفاحه والتفاحه في الثلاجه والثلاجه مقفوله والمفتاح عند النجار والنجار يبغى عروس والعروس تبغى ولد والولد يبغى حليب والحليب عند البقره والبقره تبغى حشيش والحشيش فوق الجبل والجبل يبغى مطر والمطر من عند الله
تقول كلمات الاغنية التي نغنيها لولدنا، و هي تختلف عن الاغنية التي في الفيديو قليلا
دوها يا دوها
والكعبة بنوها
وزمزم شربوها
سيدي سافر مكة
جاب لي زمبيل كعكة
والكعكة عند الخباز
والخباز يبغى حليب
والحليب عند البقرة
والبقرة تبغى حشيش
والحشيش فوق الجبل
والجبل يبغى مطرة
يا مطرة حطي حطي
علي قريعة بنت اختي
بنت اختي جابت ولد
سمته عبدالصمد